आजदेखि टुँडिखेलमा रामदेवको योग शिविर, राष्ट्रपति यादवले उद्घाटन गर्ने

काठमाडौं । चर्चित भारतीय योग गुरु रामदेवले शुक्रबारबाट टुँडिखेमा योग शिविर सञ्चालन गर्दैछन । योग शिविर सञ्चालनका लागि बिहीबार दिउँसो काठमाडौं आइपुगेका रामदेवले आफै योग शिकाउने छन । उनी काठमाडौंस्थित पतञ्जली योगपीठको कार्यालय मण्डिखाटारमा बसेका छन ।

रामदेवले नेपाल र भारतबीच रहेको वर्षौं पुरानो सम्बन्धलाई योग शिविरले अझ प्रगाढ बनाउने विश्वास व्यक्त गरेका छन । स्वस्थ जीवन जिउन चाहने हो भने योग गर्न उनले सबैलाई आग्रह गरेका छन्। रामदेवले शुक्रबारदेखि मंगलबारसम्म टुँडिखेलमा निःशुल्क योग शिविर सञ्चालन गर्नेछन् ।

 शिविरको राष्ट्रपति डा. रामवरण यादवले शुक्रबार बिहान उद्घाटन गर्ने कार्यक्रम छ । शुक्रबारको शिविर बिहान सवा पाँच बजेदेखि पौने आठ बजेसम्म सञ्चालन हुनेछ। रामदेवले लोकतन्त्र दिवसको अवसर पारेर शुक्रबार साँझ ४ बजेदेखि ६ बजेसम्म विद्यार्थी तथा अभिभावकका लागि छुट्टै योग प्रशिक्षण सञ्चालन गर्नेछन् ।

रामदेव ध्यान र योगको माध्यमबाट स्वास्थ्य चेतना विस्तार गर्ने अभियान लिएर विश्व भ्रमणमा छन्। रामदेव आएपछि उपत्यकाको सुरक्षा व्यवस्था कडा पारिएको छ। उनको आश्रम वरपरका क्षेत्रमा सुरक्षाकर्मी बढाइएको प्रहरीले बताएको छ।