छोराको हत्यारामाथि कारबाही नगरिए आत्मदाह गर्ने चेतावनी
काठमाडौं, चैत्र ११ । १८ माघमा नवलपरारीको जङ्गलमा मृत अवस्थामा फेला परेका दीपेन्द्र पाण्डेका बाबु गजेन्द्र पाण्डेले छोराको हत्या भएको दाबी गर्दै हत्यारालाई उन्मुक्ति दिने षड्यन्त्र भइरहेकाले न्यायका लागि सबैबाट सहयोगको आग्रह गरेका छन् । रिपोर्टर्स क्लब नेपालमा बुधबार पत्रकार सम्मेलन गर्दै उनले घटनास्थलको प्रकृतिले हत्या देखिन आउँदा समेत बेवास्ता गरी आत्महत्या उल्लेख गरेकोतर्फ प्रहरीप्रशासनको आलोचना गरे । दोषी पत्ता लगाई तत्काल कारबाही नगरिए आफूहरू आन्दोलनमा जान वाध्य हुने चेतावनी दिए ।
छोरालाई धारिलो हतियार प्रहार गरी हत्या भएको र त्यसमा शंकास्पद व्यक्तिहरूलाई समेत प्रहरीले विना कारबाही उन्मुक्ति दिएको बताए ।
कावासातीमा होटल व्यवसायी गरेर बसेका पीडित पाण्डेले भने,‘छोरालाई हत्या गरिनुपूर्व केही व्यक्तिहरूले ज्यानको धम्की दिएका थिए ।’ धम्की दिनेहरूसँग आफूहरुको होटलमा बसेको र रकम लेनदेनमा विवाद रहेको समेत उल्लेख गरे । शंकास्पद व्यक्तिहरूको नाम दिदा समेत बेवास्ता हुनुले शंका जन्माएको उनको भनाई थियो । हत्यारा पत्ता लगाउन सकेमात्र पनि मनमा केही शान्ति हुने भन्दै आवश्यक दबाब सृजना गर्न सहयोगका लागि संचारमाध्यमसँग आग्रह गरे ।
भावविह्ल बनेका पाण्डेले दीपेन्द्रकी पत्नी र तीन वर्षीय छोरा दीपसागर पाण्डे घटनापछि निकै पीडामा रहेको सुनाए । आफूहरूमाथि अन्याय भएको भन्दै न्यायका लागि सबैको सहयोग पाउने आशा व्यक्त गरे ।२८ वर्षीय दीपेन्द्र पाण्डे १७ माघको अपरान्हबाट हराएको भन्दै बाबु गजेन्द्रले १८ माघमा विभत्स अवस्थामा जङ्गलमा शव फेला परेको सुनाए । घटनावस्थाको तस्वीरसहित पत्रकार सम्मेलनमा सहभागी भएका उनले घाँटी रेटिएको अवस्थामा शव फेला परेको बताए । प्रहरीले चाहिं दीपेन्द्रले आफैले घाँटी रेटेको अनुसन्धान विवरण तयार पारेको छ । मृतकका बाबु गजेन्द्रका अनुसार सामान्य अवस्थामा रहेको, मद्यपान र धुम्रपान समेत नगर्ने छोराले आत्महत्या गर्ने कल्पना समेत गर्न नसकिने बताए ।
घटनाको दिन क्याटरिङ संचालन गरिरहँदा छोरा काम प¥यो भन्दै स्कुटी लिएर निस्केको सुनाए । फर्कन ढिलाई गरेपछि फोन सम्पर्क गर्दा नलागेको र सोही राति १० बजे घण्टी गएको तर नउठाएको विवरण सुनाए । खोज्दै जाँदा पूर्व पश्चिम राजमार्गको मध्यबिन्दुको थुम्कीदेवी सामुदायिक वनमा फेला परेको बताए । घटनास्थल राजमार्गबाट डेढ किलोमिटर भित्र पर्ने समेत सुनाए । घटनास्थलभन्दा सय मिटर वर स्कुटी फेला परेको थियो । -न्यूजअभियान डट कम बाट