महिला साफमा नेपालले बंगलादेशलाई हरायो, अब भारतसँग फाइनल भिडन्त गर्ने

काठमाडौं, मंसिर ३ । पाकिस्तानमा जारी तेस्रो महिला साफ च्याम्पियन्सिपको आजको खेलमा नेपालले बंगलादेशलाई १–० ले हराउँदै फाइनलमा प्रवेश गरेको छ । पाकिस्तानको जिन्नाह रंगशालामा बुधबार दिउँसो भएको खेलमा दोस्रो हाफमा सृजना रानाले गरेको एक गोल नै नेपाललाई फाइनलमा पुर्याउन का‍‍फी भयो ।

उनले खेलको ५६ औं मिनेटमा पाएको पेनाल्टीलाई सदुपयोग गर्दै गोल गरेकी थिइन् । नेपालले बंगलादेशलाई दबाबमा राखेपनि खेलको पहिलो हाफभरी गोल गर्न सकेको थिएन । यसअघिका दुबै संस्करणमा उपविजेता बनेको नेपालले अब भारतसँग फाइनल भिडन्त गर्ने छ ।

नेपाललाई भारतले यसअघिका दुबै संस्करणमा हराउँदै उपाधि जितेको थियो । बुधबारै भएको अर्को सेमिफाइनल खेलमा भारतले श्रीलंकालाई ५–० ले पराजित गर्दै उपाधिको ह्याट्रिक नजिक पुगेको छ ।