गायिका दिव्यज्योतिका मर्मस्पर्शी गीतहरु - भिडियोसहित

करीब दुई वर्ष अघि पागल बनायौ प्रिय बोलको गजलसँगै सांगीतिक बजारमा उदाएकी दिव्यज्योतिको त्यही गीतको बोल जस्तै उनको आवाजले धेरैलाई पागल बनायो,धेरैको मन बहलायो,उनको आवाजले धेरैलाई जादु पनि लगायो । यद्यपि अर्का गायक शिव परियारले पनि यही गीत गाएका कारण दिव्यज्योतिलाई आफ्नो परिचय स्थापित गराउनु निकै चुनौती पनि थियो । तर श्रोतालाई पागल बनाएकी उनले अन्ततः बाजी मारिन् । श्रोता र दर्शकहरुले यो आवाजलाई मन पराए । त्यसपछि उनले आफ्नै आवाजमा नजर एल्बम ल्याइन् ।

जुन एल्बम उनको एकल कोसेलीको त थिएन,तैपनि उनको आवाजका तीन गलजले दिव्यज्योतिलाई एक कदम उचाईमा पुर्यायो । नजरमा मदहोसीमा र यसपाली त गरी दुई वटा गजलमा उनलाई प्रेम सेनले साथ दिएका छन् । नआउ नजरमा बोलको गजल भने प्रेम सेन र दिव्यजोतीको छुट्टाछुट्टै स्वरमा ‘नजर’मा सुन्न सकिन्छ । नजरपछि उनको आवाजमा हालै सम्झनाको पाना नामक म्युजिक एल्बम बजारमा आएको छ । यसमा एल्बमको शीर्ष गीत सम्झनाको पानासहित उनले तीनवटा गीतमा आफ्नो मेलोडियस आवाज दिएकी छिन् । सम्झनाको पानामा उनीसहित शिव परियार,प्रमोद खरेल,आँशुसेन लामा र मिलन अमात्यको पनि आवाज रहेको छ । सम्झनाको पानाभित्र पाँच दशक पहिले लेखिएको एक गीतमा पनि दिव्यज्योतिले आवाज भरेकी छिन् ।

फकाई लेउ लठ्ठयाई देउ यो रुपवतीलाई
यसैमा फुल यसैमा भुल यसैमा रमाई
मायालु पनको यो दिलको भाका ल भन कस्तो छ ?
ल भन तिमी…..
उषाको लाली सगरको छाती अनेकौं मिलेर
बनेको छ है यो प्यारो बदन तिम्रो नै भनेर
जिवनमा मेरो तिमी नै तिमी ल भन कस्तो छ ?
ल भन तिमी…….

स्वर्गीय प्रेम राणा र चन्द्रबहादुर केसीको रचनाको यो गीतलाई दीपक अर्यालले ५२ वर्ष अगाडि कम्पोज गरेका थिए तर विभिन्न कारणले पा“च दशकसम्म यो गीत रेकर्ड हुन सकेको थिएन । अहिले यो गीत रेकर्ड भएर बजारमा ल्याइएको छ । ५ दशक पुरानो यो गीतमा स्वर दिन पाएकोमा आफू एकदमै खुशी भएको गायिका दिव्यज्योतिको भनाई छ ।
सांगीतिक आकाशमा फड्को मार्दै अघि बढेकी दिव्यज्योतिको आवाजले अझ सफलता चुमोस् ।