तपाईले एक्कासी रु.एक लाख भेट्टाउनुभयो भने के गर्नु हुन्छ ?

धुलिखेल, चैत २ । एक लाख रुपैँयाको बिटो सडकमा भेट्टाउनुभयो भने तपाई के गर्नु हुन्छ ? एक लाख रुपैँया खर्च गर्ने हरेक आ-आफ्नै उपाय होलान् ।

काभ्रे, भूमिडाँडा –७ का हरिप्रसाद हुमागाईं दम्पती भने भेट्टाएको एक लाख रुपैयाको बिटो सम्बन्धित व्यक्तिलाई नै फिर्ता गरेर उदाहरण बनेका छन् ।

पत्नीले भेट्टाएको एक लाख रुपैँयाको बिटो हरिप्रसादले आइतबार सम्बन्धित व्यक्ति रामेछाप भलुवाजोर–२ घर भई भक्तपुर कौशलटार बस्दै आउका टिपर व्यवसायी अर्जुनबहादुर थापालाई बुझाए । उनले बनेपास्थित चेष्टा साप्ताहिक पत्रिकाको कार्यालयमा आएर उक्त रकम थापालाई दिए ।

‘भेट्टाएको पैसा हराउने व्यक्तिलाई हस्तान्तरण गर्न पाउँदा आनन्द महसुस भएको छ’, हरिप्रसादले पैसा फिर्ता गरेपछि भने, ‘भेट्टाएको पैसाले जीवन चल्दैन भनेर फिर्ता गरेका हौं । आफैंले परिश्रम गरेर चलाईरहेका छौँ ।’

हरिप्रसादकी पत्नी गोमाले शुक्रबार अपरान्ह ३ बजे बनेपाबाट १० किलोमिटर जति टाडा भूमिडाँडास्थित सडकमै एक लाख रुपैयाँको बिटो भेट्टाएकी थिइन् । अन्नपूर्णपोस्ट् दैनिकमा खबर छ ।